Pel de Lobo

Pel de lobo

Título: Pel de lobo                                             

Autor: Xosé Miranda

Editorial: Edicións Xerais de Galicia

Colección: Fóra de Xogo

Nº páxinas: 101                                             

ISBN: 84-8302-865-4

PREMIO MERLÍN 2002
XOSÉ MIRANDA naceu en Lugo, en 1955.
Profesor de Ciencias no ensino secundario.
Poeta e narrador. Publicou no ano
2000 O coello Federico e os amorodos, e
tamén para lectores e lectoras infantís e
xuvenís, Feitizo e Ariadna.
Participa con Antonio Reigosa e Xoán
Ramiro Cuba no proxecto de recuperación
e recreación da tradición oral galega
«Cabalo buligán».
  Acada os seguintes premios: Premio Xerais de Novela 1998 con Morning Star, con Na terra sombría gaña o premio de narrativa curta Modesto Figueirido 1988, con Historia dun
paraugas azul consegue o premio de novela M. García Barros 1990, e o Merlín 2002 coa
novela que nos ocupa; tamén o premio Eusebio Lorenzo Baleirón de poesía en 1995 con
Amantes e viaxeiros e o premio Esquío en 1996 con Permiso para o corso.
Publicou, ademais, as novelas Vestio e A tres bandas (1995), os libros de relatos A biblioteca
da iguana (1994) e O demo á orella (1996) e os poemarios Sonetosfera e Carozo azul.


A novela está narrada en primeira persoa por Xosé Nóvoa. Conta o que sucedeu nos tempos
en que sendo el un mozote de dezasete anos foi con seu pai ás terras do Incio, a onde
foran chamados para acabar cun lobo que estaba causando estragos por aqueles lugares.
Fulxencio Nóvoa, o pai, ten fama de moi bo tirador e segundo din non hai lobo que se
lle resista. Non é esta a primeira vez que o solicitan para acaban con esas pragas do inverno.
Sen embargo, desta acordarase sempre, entre outras cousas porque a partir de aí deixará
de cazar e cambiará a súa vida.
Naqueles tempos a noite impoñía o seu dominio, a noite era invencible e, na noite, o lobo
era o amo. O gran lobo negro que van buscando parece ter intelixencia, é un lobo da
xente; e vai acompañado doutro branco que ten idénticas características.
Constitúe unha homenaxe á memoria de tódolos habitantes das montañas de Galicia, á
súa fala e concepción do mundo. Unha novela engaiolante de aventuras e terror, de misterio e de iniciación da vida adulta; na que non falta tampouco unha interesante historia de amor, o debate sobre as ideoloxías
dese momento, o mundo mítico e as crenzas populares do mundo aldeán ou as historias
de cazadores.
Escrita nunha prosa de alta calidade, emprega unha lingua popular moi pulida.

A ILLA DO TESOURO

Gustaríavos ler este libro?

Escritor/a: Robert Louis Stevenson
Tradutor/a: Xavier Alcalá
Ilustrador: Federico Fernández Alonso

Ed. Edicións Xerais de Galicia,
2003 | Infantil-Xuvenil

Un mociño inglés do século XVIII vive e conta neste libro, clásico no seu xénero, unha aventura extraordinaria se é que as hai. Mesturados el e mailos seus amigos cunha grea de bucaneiros disfrazados de xente de ben, e norteados todos polo mapa que tirara o rapaz do cofre dun pirata finado na cativa pensión familiar, nunha aldea mariñeira, bótanse ó mar tralo engado do fabuloso tesouro soterrado por unha banda dos autodenominados cabaleiros de fortuna naquela afastada illa descrita no tal mapa. As peripecias de Jim Hawkins, do capitán Smollet, de Long John Silver e o resto dos tripulantes da Española significaron para varias xeracións non só a cristalización dos soños de mocidade de aventuras, senón tamén a realización literaria da ansia de escapismo que aniña en todo ser humano. Se ben, a complexidade psicolóxica dalgúns personaxes, especialmente John Silver, amosa a característica preocupación de Robert Louis Stevenson pola ambigüidade moral do ser humano, “A illa do tesouro” representa en estado puro a novela de aventuras na cal a procura mítica dun obxecto prezado actúa como móbil para a fuxida cara a escenarios exóticos onde a liberdade é posible.
Robert Louis Stevenson naceu en 1850 en Edimburgo e finou en 1894 en Samoa. Foi agarimosamente sepultado polos indíxenas no cume do monte Vaea, de cara ó Océano Pacífico. Malia a súa curta vida embazada pola mágoa dunha teimuda doenza do peito, deixou escrito: «toda a historia da miña vida é para min máis fermosa que calquera poema."

LECTURAS TERCEIRO TRIMESTRE

Como sabedes xa estamos ás portas do 3º trimestre e sería aconsellable que comentásemos cales poden ser os libros que nos gustaria ler?
Animádevos e comentádeo

fotos Xabier P.Docampo

Xabier P Docampo on PhotoPeach

XABIER P.DOCAMPO NA FONSAGRADA

    Hoxe,por fin, tivemos a oportunidade de coñecer ao autor do libro que estivemos a ler este trimestre. Estabamos ansiosos por coñecelo, pero tamén para que nos desvelase o misterio das once badaladas.
Deunos respostas a moitas das preguntas que lle fixemos pero tamén nos axudou a concienciarnos un chisquiño máis da importancia que ten a lectura e do esforzo que supón a faceta literaria.
    Pasámolo xenial!